my family

每年農曆新年，我阿爸都會去旅行，我都唔知點解。所以細個既時候，每年都會去一次旅行，去親都多數去日本。細個無得揀，一定要跟埋去。而家大左就好少跟屋企人去旅行，對上一次同佢地去日本已經好幾年前，以前不論佢地返大陸定去日本，甚至我家姐到澳洲結婚，我都企硬唔去。因為果時我既抑鬱症最嚴重，莫講話旅行，連應付每日都覺得難呢，屋企人唔知我有病，我知我阿爸唔多高興我每次都唔同佢地去旅行呢！黎緊既農曆年，屋企人準備去東京、北海道，本來我都無諗住去，九月先去完東京，邊有錢丫。但我家姐勁勸我去，佢都講得啱既，阿爸阿媽都開始老，可以去長途旅行既機會越黎越少，所以最後都決定去呢，雖然我只去幾日北海道，但佢地已經好開心lu，下年既團年飯終於可以成家一齊食喇XDD

南丫島-阿婆豆腐花

上一次去南丫島已經係幾歲既時候，記憶中有個水上樂園，有得坐下水上單車之類既水上活動，上個月第二次踏足南丫島，水上單車當然無得玩啦！沿大街走，有唔少店舖都頗西化，因為好多外國人都搬入南丫島住，貪其方便，來往中環只需二十五分鐘船程。可能多外國人既關係，食野都吾算平，一個lunch都要四十蚊，不過大部份食店都有向海既露天坐位，幾舒服架！南丫島聽聞有間食豆腐花好出名，離大街大約十分鐘路程，就會見到有間好簡陋既鐵皮檔口，旁邊有個寫住“建興阿婆豆腐花”既招牌就係喇！但賣豆腐花既係阿伯，洗碗既先係阿婆，哈！豆腐花冷熱都只係$6一碗，配上薑汁既山水豆腐花的確比平時食到既滑呢！