安室Vidal Sassoon new CM "REBORN/ AMUROAD WORLD"

安室第三度成為VS嘅代言人，今次sell嘅唔只係洗頭水，仲有一系列嘅造型產品。幕後班底都係果兩位勁人，即係曾經為'sex & the city'及'穿prada的惡魔'中擔任stylist既patricia field，以及madonna既髮型師orlando pita。廣告分別有兩個theme，"REBORN"及"AMUROAD WORLD"，CM song當然係安室嘅新歌"MY LOVE"及"COPY THAT"兩首都十分唔錯！CM仲未on air，但可以係網上先睹為快！
"REBORN" 30sec CM
"AMUROAD WORLD"30sec CM
interview & making of (AMUROAD WORLD)片中有patricia field同orlando pita嘅interview，學到唔少野!
最初睇呢三個style覺得無咩特別，但仔細睇，發覺每個outfit都用左廣告中LONDON, RUSSIA, L.A嘅原素。三個造型中最喜歡係LONDON，個頭set得超靚，boylish得黎又有女人味，英倫嘅千鳥格同格仔，都可以係呢套outfit度搵到，格仔襯格仔唔好話易襯呀~成個style boylish得黎又有D女人味，呢種髮型好多時愛黎襯較cool嘅西裝look或者高貴嘅晚裝look，但配合呢套casual嘅造型，又幾好睇喎，高人真係高人！

BEST FICTION再破記錄！yeah!!

今日係安室32歲嘅生日，お誕生日おめでとうございます☆
繼BEST FICTION專輯上年成為首位女歌手連續六星期紅霸日本oricon公信榜冠軍後，9/9剛推出嘅BEST FICTION TOUR 08-09，又再破記錄，DVD同Blu-ray都成為最高銷量嘅女歌手，初動已達155,000!!相信BEST FICTION嘅成績絕對係安室上年同今年最好嘅生日禮物！
By the way,不論係專輯嘅cover同埋今次DVD嘅cover，我都相當鐘意，好想知道呢個噴筆效果點做，睇黎係psd filter再retouch而成。DVD 收錄左今年六月係台灣舉行嘅BEST FICTION TOUR，今次tour係舞台，選曲（終於無唱小室作嘅歌！聽得太多~），視覺效果，concept都做得好好，唯獨係剪片實在太差，頭果段真係睇到睇到花...另外感受到嘅，就係台灣fans嘅瘋狂程度，難怪安室咁like去台灣開show啦！

豆腐蛋糕&熊貓雪糕

早兩個禮拜去apm，開左間克勤牌，出左款熊貓雪糕，$49仲送克勤牌鐵匙羹一隻，一球自選口味，另一球係雲呢拿，得apm先有得食，限定又咁kawaii一定要試下啦！
前排無意中上openrice搵野食，見到有間只賣豆腐蛋糕嘅cake shop，見食評全部都係「笑哈哈」一個「喊樣」都無，咁啱過開cwb就走去買黎試下，蛋糕只有一款，就係豆腐蛋糕，另外有幾款糕點賣，同埋老闆力推嘅自家製豆漿，豆漿味道的確唔錯，同平時飲嘅味唔同，又唔甜！糕點試過幾款，發覺都係眉豆糕最好味！而個豆腐蛋糕，其實即係豆腐味嘅海棉蛋糕，但出奇地好味喎！豆味比以前食過嘅豆腐蛋糕濃，但一d油膩感都無，又夠軟棉棉！要做好嘅豆腐蛋糕都唔易架，因為如果加得太多豆漿落去的話，水份太多，蛋糕就唔夠乾身，所以出面食到嘅豆腐蛋糕通常只有好微嘅豆味呢！老闆仲會係餅盒面畫上你喜歡嘅卡通人物，的確係有心之作！
http://www.openrice.com/restaurant/sr2.htm?shopid=31566

SML+和櫻屋=joe's BD

阿祖BD，阿frey訂左位係times食dinner。所以日間嘅節目都係cwb，突然醒起跑馬地有間叫和櫻屋嘅日式布甸舖頭，聽聞唔錯，就撘叮叮去諗住tea一tea，搵完一大倫，完來間野只有外賣...（都我衰，無做好research!)　唯有買幾個布甸同jelly，搵間麥記坐低食。買左抺茶同芝麻布甸&菠蘿橙味jelly。抺茶布甸太重奶味，無抺茶味，唔多惦！芝麻布甸芝麻味夠濃但都係奶味太重，返而個星形菠蘿橙味jelly唔錯！啱啱俾之前個濶太買哂個原味布甸，我估呢個先至係最好食！
夜晚等齊人上左食通天嘅SML食晚飯，餐廳裝修簡約，全部木枱櫈。睇過餐牌先發現每樣食品同飲品都有大中細碼，唔怪之得叫SML啦！S size嘅食物得一小碗，啱哂d食得少嘅女仔，M size同平時食嘅一人份量差唔多，而L size 2至3人share食啱啱好！食物方面偏西方口味，意大利粉，意大利飯，steak同紅酒都有。叫左成十碟野，最好食係白酒蜆肉意粉，鮮茄燴牛尾意大利飯，雖然呢兩樣野度度都有得食，但真係出奇地好味！較特別嘅係魚子醬雞肉配麵包，成樽魚子雞肉醬，魚子醬當然得面個少少，但配上法國飽，又幾好味喎！總括黎講成餐飯大部份嘅野都好食，除左個蝦多士&四色芝士團，超臭~係芝士果d臭~平均每人都係百幾蚊，ok!可以再番兜！但基本上好難walk in咁食，都係要訂位。
和櫻屋嘅布甸
dinner@SML
大合照！

鹹田

早兩個星期六，終於去左ivan力推水清沙幼嘅鹹田，鹹田係西貢附近，前往方法只有兩個，一係行山去，由赤徑行大約粒幾兩粒鐘，一係坐大飛由西貢碼頭坐大約40分鐘去。我唔行得，當然選擇後者嘅方法啦！鹹田灣無碼頭嘅，大飛會駛到較淺水嘅地方，就咁行落水上沙灘，當我一望到d海水，真係嚇一跳！不其然話：呢度香港黎架？d水咁清嘅？鹹田灣可能較遠嘅關係，沙灘唔多人，比著係呢d天氣去石澳清水灣，肯定爆多人。沙灘多數係坐遊艇黎嘅外國人多，灘上有兩間士多，但我覺得係餐廳，唔係士多囉！炒飯炒麵都有得食，水準好過好多茶餐廳添！鹹田的確係一個hei嘅好地方，唔洗曬，又夠靜，大家都拎哂書黎，唔係打機就睇書，hei到悶就落水浸下！唯一唔係咁好嘅地方就係無企理嘅沖身地方，要俾$5士多，先有間簡陋嘅沖身房仔，女仔黎講唔太方便囉！
水清沙幼，以為去左泰國XD

垃圾唔見有，海星反而有，真係第一次見
經過呢條橋就到士多
流水嘅痕跡
潮退後，形成一層層嘅沙
海天一色，香港難得一見呢