食粥五餐

上星期開始一食野就肚痾，其實耐唔耐就係咁，都係d感冒清唔到，腸胃炎感冒菌入腸之類，但今次食完藥都無點好到，前兩日一起身就胃痛痛足成日，六個鐘內食左三種唔同嘅胃藥都無好到，第二日唯有去仁安睇，醫生話如果係腸胃炎的話，無理由咁耐都唔好，佢"襟"我個胃同腸嘅時候都係痛，醫生話如果食左佢d藥都無料到嘅話，最好照下個胃同腸。今日食第三日藥，胃就無再劇痛，但腸都係超脹，已經食粥五餐，戒口真係幾慘，呢幾日除左粥，通粉同麵包係我嘅早午晚餐外，咩都無食，但今日又黎食完野又痾，雖然唔係痾得勁，但真係唔知d腸胃搞咩！真係唔多想照，照胃都還可以，照腸嘅內視鏡要係肛門放個內視鏡入去>O<！年尾的確特別黑，腰又未好，又成日感冒，又訓唔好，而家腸胃又唔知搞咩~快d到新年啦!

amazing, simple-iPad

apple又出新野，尋晚凌晨兩點先係官網公報，今朝一起身就上apple睇哂成個發報會，我諗得apple先有咁大動力令我會花個半鐘睇哂一個全英文嘅發報會。之前已有消息流出指新產品係一個平板電臘，簡單黎講iPad係一個放大版嘅itouch+縮細版嘅laptop，所有指令只需用一兩隻手指就可以上網，email，玩game，聽歌，睇書，簡單文書處理，簡單得很，就算俾我阿媽都會好快識用！你可能話，咁我部電話,laptop都做到啦！有咩咁特別！？你想知有幾神奇，簡單，方便，真係要睇下發表會條片XD！我覺得不論你要見客做presentation，又或帶出街，旅行，露營當娛樂或地圖都好，iPad的確fit哂各方面嘅要求。最平一部16GB iPad只係大約$3900，但我會prefer有埋3G果款，都只係多加$1000!的確唔只係一部超薄輕巧嘅"平板電腦"，更係一部"平版電腦"!
如果加上ipad dock同keyboard，立刻變成一部迷你desktop
跟機case都照顧到唔同情況嘅需要，可直立式方便睇相或電影，平臥式就方便打字，肯定第時會出更多唔同款嘅ipad case

十個著九個男人都係....

前排同sam(女仔黎架）出黎食飯時傾開「男人」呢個問題，發覺身邊嘅男同事，男性朋友或者ex都好，多多少少都有以下嘅共通點，如果你係男人但無一個point中的話，咁又唔代表你唔係男人黎嘅XD

十個著九個男人都係....

1)　唔鐘意食甜品同"咸濕野"即係話梅果d

2)　唔鐘意飲水，唔飲熱飲

3)　唔食木瓜

4)　唔鐘意送花，價錢貴係另一個問題，主要佢地覺得，拎住扎花嘅男人係好7好樣衰XD

5)　唔細心揀禮物，多數都係最後果刻先去諗，先去買，時間關係，不外乎都係頸鍊，香水呢d野，又或者問你：你想要咩？

6)　鐘意食濃味野，炸野，食清淡d嘅野，佢地覺得無味，唔好味

7)　鐘意認叻，由無聊野到專業野都好，言語中多多少少會表現自己，但佢地自己通常唔覺

8)　鐘意換，買or 時常upgrade嘅用品eg. 車, 電話, 相機, 電腦，遊戲機

9)　病到死都唔睇醫生

10)　洗手只會係咁二濕下手指就叫洗左手

胃食二人組之 添好運點心宴+秋田犬八千

又適逢阿祖放假，上次去添好運唔小心等到過左no.無得食，為免係MK白等幾粒鐘等食，就打算是旦搵套戲睇消磨時間，時間最夾就係呢套「秋田犬八千」，之前聽聞話有人連睇預告片都喊，好跨張下~　睇到後半部份時，都聽到周圍唔少"索"鼻水聲，不過唔知係喊定傷風喇！最後完場時人有三急去toilet，當我係廁格一出黎時，見到四五個正排隊去廁所嘅女士喊到面紅鼻紅，仲用紙巾抺緊眼淚...我又無睇到喊呀，比較感動位有一個嘅，但可能我無養過狗，又預先知道個故事個結局，所以未至於感動到喊。如果係愛狗之人，我都覺得會感動到喊嘅。
睇完戲行返去添好運，等多陣就有位喇！不過間舖實在迫到死，係45分鐘用餐時間裡面，我足足起身六次俾其他客人出入!點心平時食得太多，由平價到貴價都食過，雖然添好運係由前四季酒店龍景軒點心部主管開嘅，但一d驚喜都無，同平時食嘅點心差唔多，只係招牌脆皮叉燒包比較好食，但未至於值得等兩三粒鐘去食佢嘅點心呢！一試無訪，但無下次，除非唔洗等位啦！
脆皮叉燒包 $12三個，抵食！

大澳兩小時遊

星期六好好天，就出發搵地方影相，最後揀左應該幾歲大時先去過嘅大澳。唔去唔知咁遠，又沙田坐E車去到東涌差唔多一個鐘，再又東涌坐11號巴士去大澳，又要一個鐘，來回差唔多四粒鐘，但逗留嘅時間只有兩個鐘左右XD，其實大澳得條吉慶街叫做有野行，由街頭到街尾都係賣海味，好彩仲有小食賣，有燒魷魚乾，茶果，雞屎藤，仲有賣飛佛嘅雞蛋仔，仲要係炭爐燒嘅，係香港真係絕跡咁濟。
係大澳果條橋度影
黑超阿伯賣嘅炭爐雞蛋仔，製作時間竟然比一般用電熱板嘅仲快!
炭爐整嘅的確別有風味，但口感較稔，似蛋糕仔多d，但反而啱我口味，太脆得個"蛋殼"果d，反而唔係我飛佛！
大澳海邊嘅屋都係長方形一格格，好似貨櫃咁嘅鐵皮屋，呢間我諗係大澳唯一嘅飛髮舖
嫌重，無帶支18-200，結果只係影到細細粒嘅蛋黃仔，"殘念"

胃食二人組之 清真牛餅與tony西餅

人氣整餅大師Tony Wong，曾經係尖咀帝苑酒店糕餅總廚，又係有線電視做節目教人整甜品，出食譜，人氣持續高企...放棄高薪厚職，前排係九龍城開左Tony第一間嘅夢想cake shop-Patisserie。上星期又同好甜嘅胃食祖向九龍城出發朝聖！未食cake之前，先去清真牛肉館試下佢招牌嘅牛肉餅先，個餅皮最好味，裡面舊牛肉都唔錯，但d油就太多，倒哂d油出黎先食為妙!食完牛餅再去食西餅XD 行過兩條街，終於到達Patisserie，五點鐘都人頭湧湧，舖頭好細，只有兩張圓枱仔for堂食，大部份客都係外賣或者拎已訂嘅蛋糕。我地本身諗住等左位後先order，但等等下發覺雪櫃裡面嘅cut cake好快俾人橫掃一空，拿拿淋order左hold起想食嘅cake先。等位時見有個男人一條友叫左件opera同一件chocolate truffle，見佢食件朱古力食到尾時，起勢咁用叉刮張墊餅紙，刮d朱古力醬黎食，爭在未用條脷lai碟XD 我心諗：有無好食到咁呀，平時食呢d朱古力cake只會覺得甜到爆，仲會用叉new開d醬同cream，只食蛋糕部份。點知到我食呢件truffle時，真係一d漏都唔覺，又唔係好甜，朱古力帶些少苦味，聽聞佢係用西班牙朱古力名牌chocovic同比利時朱古力做，果然無得彈，最後我地都好似頭先條友咁，起勢咁刮張墊餅紙食埋d朱古力XDD
chocolate truffle, blueberry cheese cake & napoleon $35一件食到酒店級數嘅蛋糕，又唔算貴！拿破倫都好食，裡面d吉士又係唔甜，脆得黎又夠鬆good! cheese cake就返而無咩特別。
推介嘅chocolate truffle，裡面有chocolate mousse，朱古力味好濃郁，甜點啱啱好，成哂成個都唔會覺得漏，賣相同味道都滿分!
呢個係招牌cake，靚到暈！不過好貴，$80一件，仲要早去先有機會買到！果日去到已經清哂lu~
逢星期一休息，11:00-20:00 

細細個到大大個

幫阿bob搵隻cs3時，無意睇返n年前嘅相簿，見個printer(連scanner)未收埋，就無無聊咁scan左d以前嘅相....
左邊果個就係我，細個時皮膚唔知點解好黑，大左先白返，同安室一樣，細個都係咁黑XDD
呢個冬菇齊陰頭係我做咁多年人裡面，唯一剪過最短嘅一次，仲要係電嘅，超樣衰！當然髮型都係阿媽決定，自己無得揀。
中學除左校隊相仲有留底外，其他嘅都失哂踪，呢張係讀design時係自己個位度影，成個位都貼滿安室相XD
叫做第一份工，東京三菱銀行，lastday時影，諗起n年無收花，對上一次收竟然係zevil送果扎=_="
第二份幫六叔打工，呢張06年 dor dor lastday時影嘅
第三份工-呢張係一入堡記時，老爺唔知做乜整圍裙，搵我著哂堡記d衫影左呢d騎呢相，最後d相我都吾知佢用黎做乜~

OMG!!

安室同諧星田村淳年尾去L.A.旅行被狗仔隊拍到，想唔認到唔得。呢個新聞係日本藝能界鬧得熱烘烘，當然係唔看好呢段戀情啦！有人唔明安室鐘意親嘅都係醜男，我反而覺得醜唔係問題，人品先係重要。田村出名花心，過往女友多不星數，由藝人到av女都有，最弊係話田村有舖隱，就係鐘意用針孔攝錄機偷拍與女友嘅親熱過程，之後同其他諧星好友分享>o< OMG!!仲要田村年尾係電視節目聲稱自己一夜情對象超過400人，並表示會在香口膠包裝紙上寫聯絡電話的方式溝女，佢咁嘅樣都溝到咁多女真係靠把口，不愧為日本出名嘅諧星~田村係記招會稱佢同安室係上年朋友開嘅party中認識，係冬天先開始一齊，仲話係對安室係認真，更話脫離"Playboy"嘅稱號，認真拍拖（搵鬼信咩!) 被問及結婚嘅問題時，強調只係啱啱開始，但未來會結婚都吾係無可能！希望佢地拍還拍，千奇又唔好搞大左，如果唔係四月開始果七十幾場tour凍過水！

xmas@D deck

早前睇到愉景灣D deck嘅推廣，xmas至元旦期間，只要惠顧D deck嘅餐廳滿$100就送一張往中環嘅船飛，見D deck有好幾間餐廳嘅食評都唔錯，而且間間都係海邊，有海景之餘，位置理想嘅話，仲可以睇到廸廸尼嘅煙花添！以乎都幾有氣氛，就早少少訂位，訂左Koh Tomyums食泰菜。餐廳細細間，有室外同室內嘅座位，知道xmas唔太凍就訂左坐室外，的確幾好氣氛，望出去係海，下面間西餐廳有live band唱下英文歌xmas songs咁！食物出奇地好食，最好食係個菠蘿焗飯:P埋單都係三百幾蚊，好過係市區迫住食幾舊水嘅聖誕大餐呢！食完行過沙灘，有好多個用燈繞成嘅心形燈飾，不過實在黑到爆，能見度得一兩米左右，又凍凍地，見d情侶仲坐係沙灘談心，我呢d咁唔識浪漫嘅人，當然唔會加入埋一份啦，只係影兩張風景相就閃去撘船lu，最後因為船飛免費，去到中環旋即坐渡輪過尖咀，就咁樣由愉景灣出尖咀只係用左$2，仲睇埋兩岸嘅燈飾，nice & cheapXDD
唔好睇d相好光，實際環境超黑，所以幾好情調架！
沙灘上嘅燈飾
由海灘影過去D deck嘅全景，沿住海邊都係餐廳，呢個黑嘅程度先係實際環境嘅光暗度，係咪好暗呢XD？

平安夜@廸廸尼

平安夜諗唔到節目，最後選擇左去廸廸尼，見佢xmas又無特別加價，又有煙花，又玩飄雪，好過洗幾百蚊只係食一餐聖誕餐呢！對上一次去disney應該係前年，今次去都有d進步嘅，小食多左d選擇，不過都係無咩特色兼掠水，另外，街上面多左d拎住掃把嘅疑似清潔人員，用掃把沾水就係地下畫上唔同嘅卡通人物，勁！至於飄雪，其實係好細嘅肥皂泡，都真係幾似落雪，但地下就變得好滑囉，要好小心行免得PK~
今年mickey套xmas衫唔係咁靚，似睡衣多dXD
唐老鴨一定要影啦，賣飛佛麻!
呢個就係用掃把畫嘅，超靚!

好大雪呀!