BO-LO’GNE Café & Bar

九月開始忙，襯呢個星期無咩做，就請左日假抖下。阿祖又放假，佢提議去上環一間開左無耐嘅cafe度食tea，呢間cafe唔係出名咖啡靚都唔係環境正，而係麵包！包嘅材料由日本老闆由京都訂返黎。cafe面積好細，只有三張枱，到達時，一張枱有兩位日本女仕用饍中，呢一張有三位闊太暢談中，點知佢地係闊太？因為其中一位係拎住Hermes袋嘅伏明霞，幸好還有一張枱俾我地。堂食的話，大約有十款tea set選擇,　以出名嘅八十一層麵包配合生果、雪糕、caramel、北海道cream等配料而成。我地叫左banana caramel toast同埋french toast，個名雖然係toast，但絕對唔係茶餐廳嘅多士，而係一塊有八十一層嘅方包，上面加上一塊塊嘅香蕉，配合微甜嘅caramel同玉桂粉，買相好似又甜又漏，但食落一d都唔漏，食多兩塊都得！同場仲有自家製嘅果醬，好想買，可惜糧尾無錢，下次去一定要買返樽！
除左八十一層麵包出名外，丹麥包同樣受歡迎。呢兩款麵包要買返屋企的話，要一星期預訂，過$200可以免費送港九區。$200唔好以為可以買好多，四塊左右嘅八十一層麵包成為$35，訂一整條包$105。丹麥包有幾種口味，大約$20。唔想等的話，每日晨早去，會有少量出售。我同阿祖都諗住夾埋訂返兩條八十一層麵包，同屋企人share一齊食！估唔到咁貴嘅麵包都咁多人訂，証明香港多有錢人啦！

想訂購的話可打電話or上cafe個網度訂http://www.bolognehk.com/
想睇下其他人嘅食評，可以去openrice睇下hhttp://www.openrice.com/restaurant/sr2.htm?shopid=32153
cafe門口
banana caramel toast
french toast 有d似西多士，但口感清新好多，仲有蜜糖點黎食。

老爺大哂

係堡記唔經唔經唔覺做左三年，年半graphic+年半vm。公司福利的確比以前好，不過人事同樣麻煩，以前六叔多女人,自然是非多，不過我唔出聲都唔會煩到我。但係堡記，就算你唔出聲，都大把人事上嘅野你煩，仲有個好難頂嘅老爺...

-兩年前，老爺個女滿月搞左個P，例牌要出席，每人俾左兩舊水做人情，但個party係室外（但佢d親戚係室內坐船），又熱又餵蚊！今年佢個女兩歲生日，又同佢係dan rayan開P,老爺叫唔洗買禮物，話俾現金佢會捐去做善事（捐去佢個女個基金？），咁即係唔好買貢品都要添香油啦，最後無去都要每人俾百五蚊。

-老爺合家百萬行，傳贊助表格叫我地贊助佢行，表格上面有張memo寫住「贊助多少無拘」，大家就每人贊助左$20，但最後老爺話我地捐得太少，就要我地分職位而決定捐幾多，我"薯仔“就捐左$50，"中薯"及"大薯"嘅就要捐$100以上。

-我地每個月都要俾$50會費，每個月生日嘅同事都要同佢食飯慶祝，呢d會費會愛黎做部份飯局嘅開資，本應生日飯局係唔錯，但其實無人想出席，因為唔想對住老爺，如果唔出席飯局，就要俾double，我就試過因為要返學缺席，就俾左三百幾蚊。老爺好鐘意BBQ，每次佢都叫我地話事食咩，但當我地決定左食咩時，佢會話點解唔去BBQ，你地唔覺得BBQ好開心咩？有次我地想食泰國野，佢又話唔舒服唔食thai野，咁遷就佢而提議去食中菜，佢又話食中菜無咁開心（咁去海皇食粥啦@x#$%)　到我唔舒服時，又可唔可以唔BBQ呢？

呢d只係公事以外嘅一丁點麻煩野，九月又到老爺生日，希望今年唔洗去BBQ啦~

山頂日落+夜景

上個月去完蘇梅果日返到香港都只係三點幾，見天氣幾好，就拖埋行李撘機鐵去香港站，寄存行李後，就撘巴士上山頂影日落。可惜一路上山，d黑雲越黎越多，上到去山頂六點左右，太陽仲未落山，從東邊吹黎一大堆黑雲，遮左半個日落....影日落又告吹，上次去白泥又係天陰而影唔到日落，日落影唔成，唯有等夜景啦，好在落山後，黑雲開始散，返而夜景幾靚呢！香港夜景我覺得係最靚嘅!
烏雲中嘅耶蘇光...
黑雲遮左半邊天
天開始黑，開燈lu
D黑雲終於散，加上日落嘅餘暉，個天好靚！不過唔記得加長曝光時間，d大廈黑得濟!
呢張曝光時間啱啱好喇!