新工後感

返左兩日工，工作上都係做設計，所以無咩特別唔習慣，只係每日要六點幾起身，轉兩程車，仲要快步兼追車先能夠一個鐘到公司。office環境有一半係寫字樓格局，零零舍舍有五個位係另一邊近貨倉，我個位就係其中一個，雖然五個位同o係工廠放四張寫字枱無分別，但我反而喜歡呢種工廠位，感覺輕鬆d，加上我個位係最入，無人睇到我做緊乜XD呢下先最好！返工只係兩日，已經見到同收到唔少關於呢間公司嘅野。呢間公司有唔少規矩同怪野，經歷過六叔珠寶果d人道最底線嘅員工守則後，呢間已見慣不怪。

怪咭
第一日返工,突然同事拎住一大疊生日咭，叫我逐張簽名，話說d生日咭係派俾國內生日嘅同事，每次都會俾全公司嘅同事簽名，聽完真係O嘴！最後足足簽左百幾張，唔知為乜！

怪味
係我見工時，一入公司已經聞到好大陣跌打酒之類嘅氣味，原來唔係跌打酒黎，係老闆娘每日都會叫阿姐煲藥材湯，仲要每人一碗，飯後放定係枱，唔飲唔得。除左湯，朝早阿姐仲會鮮榨果汁，尋日朝見到隔離個同事飲緊一碗紅豆沙嘅物體，同事話係唔知咩生果同紅菜頭榨汁，我問佢好吾好飲，佢話唔好飲都要話好飲架喎！

怪內線
呢度d內線電話好奇怪，你會做做下野，會聽到電話個speaker phone有人叫你，即係當某人打俾你，你個電話會自動開speaker phone，即時通話，所以千奇唔好亂講野，萬一咁啱有人打俾你，而你又講緊事非，咁就....

怪電線
我部PC(最憎用PC!)會突然自動熄機，追查後，原來係個插頭插得太多電制，唔夠電所以咁喎，所以而家做野要勁save，煩~

規矩
-返8:30，唔遲得到，兩星期有15分鐘走棧，過左的話，會累積到年尾，扣錢或扣假。食飯都要打咭，lunch同樣唔可以遲到
-試用期無定幾時，可能三個月，都可能半年，我個位上個人，差一日就半年，就係呢日俾人炒，但公司無得賠，因為未過試用期
-唔俾食早餐唔出奇，但有同事朝早放支奶係枱面，老闆娘都唔俾，話會引d蛇蟲鼠蟻喎

最弊係老闆好鐘意炒人，身邊嘅同事個個都做左無耐，一個做左半年，另外兩個做左兩個星期，之前老闆一年內已經炒過七八個designers，一句唔啱就bye bye，所以我都有心理準備，炒的話我都無咩感覺，因為呢間公司認真麻麻，佢唔炒我，我又會努力工作，返到屋企都會上網睇工，舖定後路麻XD

準備開工！

三個月嘅長假終於要結束，尋日晏奏去左間港資手袋公司見工，一見就係老闆，老闆五十歲左右，極之健談，談天說地，天南地北乜到up,足足見左差唔多兩個鐘...今朝呢間公司打黎話叫我聽日返工，效率奇高!最後因為我後日仲要覆診睇腰，所以改左星期一開工。返工地點係勁唔就腳嘅紅磡，仲要返八點半!! 襯仲有餘下幾日「假期」，拿拿淋去做埋d濕碎野，包括換過哂期嘅回鄉証，去醫生度check眼，睇中醫(因為仍然訓得好差)，做埋d freelance咁~講開見工，由初出黎做野到而家，發覺過往請親我嘅必定係男人，女人in我的話，唔係我唔like份job，就係人地唔請。可能我無女人緣啦！所以連熟嘅朋友都係男性佔九成~啱啱驗完眼返黎，放大瞳孔好鬼辛苦，睇野勁矇，又攰又勁怕光，成隻鬼咁，所以而家睇電視電腦都要帶返副超先舒服，下面呢個浴衣x ray-ban look咁騎呢，即刻用電腦個cam影返張相，唔好睇我好似好精神，除左副鏡就殘到嚇死人XD
平時係屋企就係咁著，試過俾送貨送外賣嘅人見到，佢地第一下都呆一呆，乜好奇怪咩？

擲膠橙

香港真係無咩地方去，加上而家陰陰天濕淋淋嘅天氣，想去影相都難。無聊地諗起幾年前去過嘅林村，果時棵真嘅許願樹仲可以俾人擲橙，而家變左棵膠樹後就未去過，就襯元宵佳節，去湊湊熱鬧！而家嘅林村似乎被粉飾成旅遊景點，以前只有兩三檔買寶碟嘅檔仔，買完寫上心願就擲上樹。而家成條路都開哂檔口仔，連小食都有得賣，傳統嘅寶碟依然保留著，但已經無買寶碟送橙一個，只係寶碟上寫上姓氏同心願就掛在一個類似日本寺廟掛繪馬嘅木架上。要再嘗「擲橙」的話，就要俾$20(好貴~)買一個同棒球般大嘅膠橙連同一張「願望點心紙」，俾你tick心願，之後就可以擲上棵膠樹上，其實真係幾搵笨！肯定佢定期會係膠樹上回收d膠橙再賣過！都係傳統嘅寶碟連橙感覺會靈d!而擲橙嘅難度相比以前都容易得多，呢棵膠樹咁矮，個膠橙又輕，細路哥都擲到上去!以前棵真樹又高，加上用真橙的話，好容易因失手，個橙跌返落黎跌爛個橙，爛左就仲難擲，仲會成手橙汁添XD
就係呢個好膠嘅燈加一張點心紙，成為$20，$20我買到十個橙喇！