PAST < FUTURE

自上年BEST FICTION精選專輯創下銷售破170萬嘅驚人記錄後，16/12將推出全新嘅專輯PAST< FUTURE，上一張專輯PLAY已兩年半前，終於等到有新專輯!大碟除收錄左可樂zero CM song"WILD"，仲收錄左Vidal Sassoon新舊CM song"Dr." "MY LOVE"及"COPY THAT",主打歌曲"FAST CAR"及慢歌"The Meaning of Us"嘅PV已經有得睇！noise超勁嘅大碟，難怪首批出貨量已破50萬張，真係可喜可賀!cover concept幾好，安室撕開best fiction poster，喻意打破舊記錄，同碟名PAST< FUTURE相呼應，可惜cover被指抄襲，不過都唔關安室事，封面設計都係俾agency做，抄唔係問題，但抄得太足喇，連個妝同髮型都抄得咁足，就抵打啦！
The Meaning Of Us

呢首慢歌真係幾好聽！好聽過MY LOVE!
FAST CAR

個PV拍得幾好，第一次見安室lolita lookXDD

唧唧曲奇

仲有個幾星期就離開堡記，例牌last day要請同事食西餅之類，計落條數，買西餅又吾平又老土，就諗住整曲奇，因為曲奇料夠平，做法簡單! 之前從來無整過曲奇，因為唔多喜歡食，所以今次要先試做一次！網上曲奇食譜好多，睇左好幾個，好多網友都大讚呢個唧花曲奇比用模做嘅更香脆！今次試做左抺茶味同moca味唧花曲奇，做法的確簡單，但唧曲奇真係好攰，要一口氣用力唧出曲奇料外，仲要keep住唧咀夠直，唔好手震，的確唔容易~好在最後成功完成，又真係幾好味喎!但至於係咪整曲奇俾同事，可能又未必，因為一整要整百幾粒，唧都唧到手軟，都係諗下先haha
唔好睇細細粒好易唧，d料幾實下，要好大力先唧到出黎架
阿祖都無力唧，最後用模crop曲奇算XD

岡田咖啡全然だめ!!

星期六晏奏約左Shirley去百利揀姊妹裙，朝早睇完條腰時間尚早，就早d去尖咀搵間餐廳慢慢食lunch，自家製烏冬同岡田咖啡同樣係板前老板開嘅，但呢兩間係openrice嘅食評都超差，連我日文同學仔都話尖咀間自家製烏冬唔惦。所以最後我去左岡田咖啡博一博，一個人去實有位！lunch set平均都要$5X，我叫左個拿破崙意粉，餐飲要熱咖啡。拿破崙意粉正路料多，青椒洋䓤火腿蕃茄汁炒就係，但佢整得真係幾難食，吾夠乾身，意粉有d硬有d林，料又少~最後黎個咖啡，招牌野應該好d啦！點知仲衰，先試一淡齌啡，唔香唔濃，加埋佢嘅忌廉，更奇怪，成杯咖啡好似杯肥淋淋嘅普洱，再落埋侍應俾我嘅日本和三盆沙糖，果種甜味同咖啡唔係好夾~我唔知係咪日本本身嘅岡田咖啡係咁。最後我半杯都飲唔哂就閃人，埋單仲要加我$10，因為我叫熱咖啡？唔係呀fa!
好大「碟」囉!
好似好正嘅咖啡
日本和三盆沙糖，我覺得似糖粉
我無加哂d cream都咁肥，click大黎睇，就會見到一杯好似你食完件白切雞再飲杯普洱後嘅樣XD

Camden Town

上星期ivan話去西貢食漢堡包，行去開滿海鮮酒家嘅海傍街裡面，零零舍舍有間白色嘅露天餐廳仔夾係海鮮酒家中間，原來呢間係ivan嘅御用髮型師開嘅，唔怪知得千里迢迢走入黎食漢堡包~坐位有室外同室內，天氣唔太熱，揀左室外嘅座位，我地叫左招牌菜嘅漢堡包，仲叫左雞翼薯條加兩杯咖啡，漢堡包的確好食，估唔到無生菜無蕃茄，只得一塊漢堡同少少洋䓤粒嘅包都咁好食!但杯咖啡就好唔得下，唔夠濃，無乜味...識得老闆嘅關係，特別贈送左忌廉湯，普通貨色無咩特別! 之後上網睇返食評，原來黑椒雞翼，炸魚塊同串燒魷魚都唔錯，點解老闆唔送呢d俾我地試呢!雖然食到好飽，但都要食係西貢好出名嘅菠蘿包，唔知係咪太飽嘅關係，都係覺得太子金華嘅好食d！
好味!唔食牛可以轉雞肉。
呢個普通雞翼，黑椒雞翼可能好食d！
西貢咖啡餅店嘅招牌菠蘿包$6，皮夠脆，但都係金華好食得多！

甜到漏!

堡記每年十一都有nov promotion，上年好落本搵阿sa去丹麥影左輯相，阿sa係輯相裡面嘅衫賣得特別好，的確係明星效應。今年公司力谷其口號"be happy"，今年nov promotion就搵左甜到漏嘅林嘉欣黎！見到佢笑個樣,真係甜到爆，我都想好似佢咁kawaii XD

まもりたい ～White Wishes～

BoA成年機乎完全離開左日本市場，主攻美國，唔知係咪要配合美國，型象都轉埋，剪左頭短髮~都係長頭髮嘅BoA靚d，まもりたい ～White Wishes～係Wii遊戲"Tales of Graces"嘅主題曲，久違了嘅慢版歌終於返黎，9/12先推出single，但PV 已有得睇喇!PV是旦左d，反而BoA係未段穿嘅Balmain褸，正是今季F/W嘅hot item，靚！可惜呢種膞頭微微彎上設計嘅衫，我諗只有artist先著得靚!