The month of MAGin

踏入四月，排山倒海般既工作開始殺到，因為MAGin開分店，繼十二月開銅鑼灣店時，得個超細window已要連續星期五六日ot o到淩晨。今云係又一城開，舖大左，window仲有兩個，呢次睇怕又黎有排O....復活假前兩日就開始set場，復活假睇怕都無得「復活」XD。再加上銅鑼灣店每兩星期換一次window，真係諗到頭都爆！滿以為過了又一城Magin後可以抖抖，點知五月頭尖咀新港又開MAGin+Sinequanone。仲要兩個brand孖住黎，洗唔洗開得咁密呀!?真係人都顛~一個人做哂mi-tu, MAGin, sinequanone既graphic+v.m！吃力非常=_="體重下降了，但皮質醇上升不少XD
Magin老闆最落本做，所以不容有失！至於間舖賣咩？就係類似i.t咁賣好多brand既衫，但Magin只賣歐洲brand，所以都幾貴，但搵我有半價haha

N2

二月某日，收到同學仔既短訊話當晚凌晨有成績公報，早訓既我當然無理會，第二朝先上網check。本身諗住肥硬既心態，估唔到竟然pass左，真係好開心。讀日文既一班同學仔，大家都覺得pass並唔代表真係有二級既程度，日文實在係無底深潭，大家識既只係好皮毛既一少部份，淨係二級既文法，又多又相似，要好熟咁記得每個文法既用法，實在對我呢d part time讀日文既懶港人十分之困難。講真，考二級前真係無點溫（我唔係果d成日話自己無溫書但又考得好勁果d人XD），主要都係懶，加上早訓既我，放工後都無時間同精神溫書，又成日唔舒服，實際溫書既時間就係臨考前兩三星期，撘車時拿本二級精讀黎睇。一共173個文法既精讀，睇到一半已經唔記得之前邊個打邊個XD　至於一級，我無打算考，因為聽完先生話一級學既野，基本上佢地日本人平時講野唔會點用，如你係日本讀大學修日文，就係一級學既野喇！聽完後我覺得....咁我唔洗考一級喇，反而練下d會話好過XD

iphone電話繩小裝置

iphone無得掛電話繩對我黎講極為唔方便，前排晨早要去沙田新城市廣場set showcase，咁啱果日套衫無袋，但電話又要跟身，唯有做野時放低個電話，就係咁，放低左個電話係個showcase頂，個showcase唔係好高，仲要係透明既，當我記起我放低左個電話時，已經係8-10鐘既時間，即刻飛奔去睇下個電話仲係唔係度，十分好彩，可能朝早人流未咁多，無人發現，不過雖然話早，已經好多大陸人係度行街，一路做野已經有幾個大陸人黎問路。搵得返個電話真係好彩！嚇Q死！其實呢次已經唔係第一次，不過之前留低電話既地方都係公司或者公司舖頭，轉頭都記得拎返，再加上好邪地，係呢日之前兩晚我發夢係唔見左個iphone!　之前係日本見過有d小裝置可以令iphone可以掛電話繩，就拿拿淋上網買，兼買埋電話頸繩，咁第時出街做野，就可以掛起身！條電話頸繩因為有我家姐資助，所以買左條BV頸繩，多謝家姐!!
本來想揀淺啡色，但今季興呢隻橙粉紅，又係新色，就揀左呢隻色喇
就係留左電話係呢個showcase上面，

兩個半月

返新工返左兩個半月，實在忙到咩咁，因為公司好多brand，一個人負責每個brand既visual野，仲要做埋graphic，加上呢間公司既ad hoc野特別"hoc"，急到今朝收到order，晏奏就要做起，真係顛顛地。好在呢度d同事幾好，阿姐又幾好，先做得開心。唯一最唔like係我部PC，15"芒加部慢腦，真係做到火都黎埋，公司有部超大芒既imac，但竟然愛黎放係reception度播公司既brand image相ONLY....每次見到部imac都覺得好"side"，見工時見到呢部imac，仲以為自己都係用mac，點Q知竟然係...真係#$%^!
前日阿姐召我入房傾probation既野，未入去之前，我估會過到試用期既，但無諗過阿姐咁like我既表現，真係有點受寵若驚，諗番起以前係堡記既appraisal,個個輪住比老爺"卒"，一㗳砂糖一㗳A，句句說話都有骨，每次都好怕做appraisal。而家總算飲得杯落，起碼辛苦得黎係值得，最後仲加左少少人工，總算幫補番我返北角既車資同業主加租兼通漲XD

初二煙花自助餐

今年都未寫過blog，新工實在太忙...2011年第一篇blog就由年初二既煙火宴作開始啦！今年新年雖然我老豆唔係香港，但年初一二既例牌拜年仍然一如以往，今年仲多左我個姪女一齊去逗利是添！初二夜晚去左尖咀YMCA食煙花自助餐，早係一個月前就晨早去排隊訂位，揀YMCA只係貪佢夠經濟，因為問過附近既食肆，就算唔係自助餐，每人最低消費都五六百蚊，實在掠水得很！YMCA既煙花自助餐有兩種，一種貴多一百蚊，但可以上方17/F既天台睇煙花，唔洗同人迫又可以勁清楚睇，的確唔錯，。但我反而揀平少少，只係係4/F餐廳隔住玻璃咁睇，因為驚室外睇d煙花聲太震撼，嚇親我姪女，又怕佢凍。不過好彩我地既座位被安排到最近落地玻璃位，睇得非常清楚。野食方面唔算多選擇，反而冷盤最多選擇，整體味道偏淡，啱哂d鐘意清清地既人仕，包括我阿媽同我家姐XD 一到八點，餐廳就熄燈，隨即一個接一個既煙花嘭嘭聲咁射上天，估唔到餐廳會同步播埋官方放煙花時既音樂，呢下真係唔錯！可惜我個姪女太細唔識欣賞，加上熄燈暗暗地既關係，佢係訓著左XD　今次係第一次係尖咀睇煙花，以前係銅鑼灣果邊睇真係爭少少，今年既8字煙花，免仔頭煙花，笑哈哈煙花同I ♥ HK煙花都睇得好清楚！不枉我晨早起身去排隊訂位XD
發發發煙花
哈哈笑煙花
I♥HK煙花，但文化中心遮左HK兩個字睇唔到XD
散場後，一望對面，超級多人!!呢度只係影到一少部份。

FION SS11 photo shooting@Macau

呢輯係肥安SS11既相（未retouch的)，成輯相我最like呢張，影靚左肥安d cheap袋啦! 其實呢次photo shoot,我並唔係以肥安既員工跟影相，因為我已resign左，相反肥安變左係客，事源影呢壇野間廣告公司係我resign前介紹比肥安，即係廣告公司既人我係識既，咁啱佢地需要個stylist assistant幫手，所以就應承左幫呢間廣告公司，加上好like個女fotop-Quist，跟下學下野都好！最後上星期請左兩日假，過左澳門影左兩日相加拍片。廣告公司加埋肥安既老闆加員工，一行18人，多都好似旅行團咁...第一日晨早到澳門，就即刻去酒店steam衫後即刻出發去漁人碼頭開始shooting。結果lunch都無得食，影足七個鐘，成八點幾先有飯食...
第二日好d，只係係氹仔影左6個鐘就完成，影完食完飯仲係官也街食個木糠布甸先閃。
成個trip最金係第一日，由係船食左早餐後，到夜晚先食野...第二金係，呢兩日我講英文多過講廣東話，因為我要幫model換衫，服侍佢，仲同佢一間房訓，但過左呢兩日都唔覺英文有進步XDD
因肥安要拍段"難"有故事性既短片放上網，所以要拍埋片，拍片好花時間，retake N次，導演指導model中...
導演指導model中...我食緊超滑既豆花中XDD
model真人有d妙麗feel，幾靚！不過靚女總係麻煩d!
呢個袋真樣係十級娘爆，影相已經影靚左！
因為老闆話要歐陸feel，指定廣告公司去澳門影，呢shot係第1shot@漁人碼頭
呢個袋勁醜，不論色既配撘同款式都無得頂!!

mister donut x 鬆馳熊

至愛既mister donut今期竟然同鬆馳熊crossover，實再太好！只要以1000yen買四個聖誕限定cake就送一套鬆馳熊玻璃水靴型杯或心形玻璃碗，當然唔會錯過啦，又抵又靚，仲有得食，呵呵！個package仲好kawaii添，真係唔捨得掉！另外一般既donut盒同紙袋都係鬆馳熊，連餐巾都有鬆馳熊個樣，真係kawaii都死！仲有一晚係機舖夾公仔，幸運地得到大大隻既兔仔頭鬆馳熊!yeah!!
為左要個鬆馳熊紙袋，唯有是旦買件外賣XD
呢個就係1000yen連四件聖誕cake，個package仲可以入埋埋套玻璃碗，日本人做package真係prefect!
四件聖誕cake包括朱古力，士多啤莉，栗子同蜜瓜味，個cream OK但裡面個cake就硬左D
心形玻璃碗
賀年版兔仔頭鬆馳熊