agnes b. cafe

之前係openrice.com睇過唔少食評都讚agnes b cafe既cake好食，都想試下，即興地同阿祖去左銅鑼灣禮頓道既agnes b. le pain grille 食tea。tea set$78包一件cake同一杯飲品，茶或咖啡有得refill。我地揀左黑白朱古力mousse cake同朱古力粟子粒mousse cake，飲品大家都揀左熱咖啡。餐廳以木枱木櫈配懷舊patten地𥖁，花紋白牆紙配懷舊牆腳，感覺似法國小鎮既咖啡店。蛋糕買相唔錯，唔算花巧，但味道就有點失望，黑白朱古力mousse cake唔夠朱古力味，似牛奶mousse多過似朱古力mousse，得個甜字。朱古力粟子粒mousse cake仲甜，食完有d"渴喉"添！我覺得好多餅店既蛋糕都比佢好食呢！至於杯咖啡，都係一般，starbucks好飲好多。雖然呢兩件cake都無驚喜，但佢地既service就真係好好！走時我take away買左兩件粟子mont blanc蛋糕返屋企試下。買兩件都包都勁靚，紙盒、絲帶、紙袋都印左logo，waiter仲好細心咁剪絲帶角；如果係美心，賣餅阿姐只會用尼龍繩極速紮盒，單手"chok"一聲就扯斷條繩啦！之後佢仲sell茶葉俾我地，仲即刻叫水吧沖左壼俾我地試，好飲真係好飲喇，清清地，聞落有果香，但真係好少會自己沖茶飲呢，結果無買到，非常唔好意思地走左。閒時享受個小high tea，同朋友吹下水，舒舒服服過一個下午都唔錯呢！