hei足四日の“中環王府水餃”

又一條友走去中環，因為lunch time中午時份勁多人，就行完H&M先去食野，行左去威靈頓街睇下有咩好食，之前經過見王府都想試下佢既水餃，聽聞好好食。水餃款式都唔少，都比較特別，例如有三鮮海參水餃，鮮肉津菜餃，羊肉京蔥餃，西紅柿雞蛋餃，鮮蝦帶子韮黃餃。我就試左鮮肉翠玉豆餃麵！麵就無乜特別，都唔錯，湯底可以話淡到水咁，我都要加豉油先食。但水餃真係好味，d肉汁好多好甜！唔怪之得食淨水餃仲貴過水餃麵呢！食完麵仲試埋佢出名既宮延甜品之一，豌豆黃，豆茸磨到好幼，又唔太甜，幾好！仲有另一隻叫驢打滾既宮廷甜品，但唔知係咩，驚唔好食，原來係豆面糕加上黃豆粉，裡面夾住紅豆餡既甜品。北京d小食名都幾得意，除左驢打滾，仲有愛窩窩、它似蜜、爆肚、門釘肉餅...不過呢d香港無得食！下次去王府要試下其他餃同蕃茄牛展涼麵先！