腰傷腳痛（後話）

前一個「前言」post同呢個「後話」可能有d悶，但不吐不快，驚悶嘅可以唔睇....自問女仔黎講由細到大都好認得痛下，唔怕"poke"親，唔怕打針，可能因為我好怕d少少事就喊哂嘅女仔，慢慢自己就變得越黎越硬淨。再加上細細個已經病痛多，大左有六隻牙要做牙橋，右眼要做laser補視網膜，之後再做矯視，最難過嘅都係幾年前嘅抑鬱病，真係未試過嘅人唔會明白有幾難捱，唔好以為開朗識諗就唔會有呢個病，都唔好以為只係心情唔開心咁簡單，係一種精神折磨黎，當時暴瘦到88磅...好辛苦地總算捱過呢個病，遺留落黎嘅後遺症間唔中都會出現，但都頂得住下。家下又黎腰患復發？點解咁黑？果時睇抑鬱病，日日飲中藥，每星期都要過海睇中醫，每個月都花二千幾醫藥費。
而家睇腰，仲辛苦過以前睇中醫，差唔多日日都要去整腰，本記事薄除左愛黎mark住幾時姨媽到外，全部都係mark住整腰嘅時間。之前講過醫嘅方法最主要係「復位」，復位前後都必定要做足５次推拿，治療，做一次要兩個鐘，唔好以為做完好爽，做完係攰到咩咁！預約平日嘅話最遲6點要到，做完8點，早訓嘅我基本上無乜時間做其他野。話明最遲６點要到，即係返工要早退啦！成日咁早退，背後聽到唔少說話，呢d說話又其次，有時見佢地ot，自己都唔好意思早退呢！星期六都係例牌去整腰，復位的話，更要花一個晏奏嘅時間...，所以每逢星期五，大家互問「聽日去邊到玩？」我一定答「睇腰囉！」對方就會話「睇咁耐都未好嘅？」我好想話「我都想快d唔洗睇，洗錢，花時，又攰，又要睇人面色兼說話，仲有好多野要做同唔做得！」有咩要做同唔做得？
1.唔好蹺腳 (唔難改吖)
2.最鐘意打波嘅我，所有都唔做得，唯一運動只有游水，但我唔識...
3.唔食得酸野，辣野，糯米（係酸野難介d姐）
4.坐得太耐同行得太耐都唔得! (咁我可以撈乜？)
5.每日都要載住個腰封，只有沖涼訓覺先可以除，戴左腰封兩個月左右，因為長期咁咕住，個胃成日都痛~
6. 假設復左"右股骨"的話，至少兩星期訓覺唔可以側右邊訓，落床都唔能夠轉右邊身落床（我上星期復左左股骨，所以而家唔可以轉左邊訓）
7.訓覺前要丁兩個專用暖包敷住腰訓
9.早晚都要搽藥膏
10.盡量唔好彎身執野，"擒高mouse低"都唔好，搬重野唔洗講實唔得（但做vm呢d野成日會做...都唔好意思成日叫人幫你做野啦)

仲有好多小習慣要做~到而家一共復左三次位，已經洗左過萬，仲要繼續復位....所以近排心情麻麻，有時身邊嘅人係到呻窮~（月尾個個都窮架啦！咁我呢？），一係話做完運動肌肉好痛，有得做運動已經好好，我無得做仲要日日都痛...每個月仲要白供五百幾蚊俾myoga ，因為唔做得運動，無得去~

多謝閣下睇完呢篇超長嘅post^^